مذكراتي في روسيا .. تجارة 2

بعد أن وجدت الفلوس في المقبرة قصدي الكبت لبست قفازات بلاستيكة ولفيت الفلوس بجريدة ، واخذتهم
رفع راسه محمد وقالي شنو لفيت بالجريدة قلت له جرجير لقيت بالكبت، نام مالك شغل

طلعت ورحت لمكتب عقاري ، قلت لصاحب المكتب لو سمحت ابي محل يصلح يكون مطعم في السنتر.
قال تبيه كم دريشة؟ قلت له الغالي ابي محل مو بلكون
قال فاهم تبيه كم فتحة؟ قلت الله يخليك ابيه فتحة وحدة من الجنب وسكر الفتحة بشيفون وخله شك خفيف ، انت اهبل شكلك خياط مو مال عقارات

قال شكلك اول مره تأجر محل أهني عندنا المهم الشبابيك ، قلت أختلاف ثقافات يمكن، ما علينا خلهم شباكين وشفاط الله يعافيك

وبعد أن أجرت المحل وضبطت العدة ونظرا لقلت الفلوس اجرنا محل شباك واحد وحطينا بالمطعم طاولتين

طاولة قاعد عليها انا والثانية قاعد عليها محمد ولابس بدلة ، قلتله " الحبيب رئيس مجلس إدارة كشك الشاورما لو تروح تنام مو احسن؟"

قال أنام؟ والحلال منو يجابله؟ يضيع يعني؟ قلت لا بارك الله بالساعة اللي شاركتك فيها أنت ومشروع حسين بن عاقول هذا، محسسني أنه فاتحين بورصة مو كشك شاورما محد راضي يدشه .

بعد فترة من الخساير المتواصلة اجتمعت انا ومحمد عند سيخ الشاورما وقررنا نتباحث باسباب الخساير ، وبعد اجتماع مطول خسنا فيه من حرارة النار خرجنا بالقرار الآتي لتنشيط عميلة البيع , عرض " أشتري شاورما وأحصل على الثانية مجانا"

طبعا كان سعر الشاورما دولار وتكلفتها نص دولار ، وبعرضنا هذا ماكو ربح ( قمة الذكاء) وعندنا اجار ورواتب معلم شاورما وبياع
قلتله محمد انت تدرس هندسة معمارية وانا ادرس طب ليش هالقافة طالما ما نفهم بالتجارة؟ قال زين الحين شنو الحل؟

قلت الحل عندي، قال شنو يابو الافكار اللولبية ، قلت أنا قريت بكتاب عن التجارة الحرة (جني صج) يقول فيه المؤلف " يجب تخفيض الأعباء التشغيلة والتكاليف الغير ضرورية" قال يعني شنو؟؟؟

قلت انت تحب الطماط؟ قال لا قلت ولا أنا ما أحبها ، هذي أعباء تشغيلية ، نشيلها من الشاورما
قلت: أنت تحب البقدونس؟ قال مو وايد ، قلت وانا بعد ما أحبه هذا تكاليف غير ضرورية نشيلها من الشاورما، شرايك نلغي فكرة السلطة كلش

قال انت متأكد أنها أعباء تشغيلية ؟ قلت " أف كورس " صدقني هذا البزنس الحديث.

ومع فكرة خفض الأعباء التشغيلية هم خسرنا ،

قال الحين شنو الحل يا بو الأعباء؟ قلت الحل ( جان اتلفت يمين يسار وأقرب منه) الحل نتهرب من الضرايب، قال الله يستر وين أخرتها معاك؟ شلون نتهرب من الضرايب ؟ قلت نقول لهم نبيع الشاورما بربع دولار واحنا نبيعا الصج بدولار ونعطيهم ضريبه اقل.

وبعد يومين من تطبيق الخطة جانا مفتش ضريبي متنكر وسأل عن سعر الشاورما وطبعا باعوه بدولار ووجهت لنا تهمة تهرب ضريبي وتسكر كشك احلامي وراحت فلوس محمد المعفنة.

جاني يصارخ قال شفت آخر أفكارك؟ شفت شصار؟ قلت ولا يهمك أنك تسقط مره مو معناه أنك فشلت، مشروعنا الجاي بيكون أعظم ومدروس وراح نستفيد من نكسات وتجارب الماضي. قال شنو ؟؟ قلت تجار سوق سودة ، قال شكلها أيامي السودة معاك.

يتبع ...