الحلقة السابعة : من ذكرياتي ( تجارة )

كنوع من الهوس الموسمي ثارت بين اوساط الطلبة العرب في روسيا تقليعة جديدة...

كشك لبيع الشاورما

قررت دخول هذا المعترك بقوة تدفعني حماسة (خبال) الشباب

أقنعت احد الشباب اسمه م.م (مثل الجرايد ) ندخل انا وياه شراكه في مطعم عربي

كان محمد( ما فضجته ) خريج في السنة الاخيرة ، وكان ينزله اعانة الطلبة من التعليم العالي وكان الطالب الوحيد بروسيا اللي يوفر فلوس ( شلون ما ادري ) يمكن يرجع السبب لانه ينام 16 ساعة باليوم فيوفر فيها وجبتين ويطلع عليه الشهر 10 أيام!! والثمان ساعات اللي يقعدهم ( يتمغط ساعتين ويقنع نفسه أنه يروح ياخذ شور ساعةونص ويطالع التلفزيون وهو يلبس (ثلاث ساعات) ويروح الجامعة ساعة ويرد ينام 16 ساعة ..

برنامج يومه ثلاث سطور ومصروفه اليومي وجبة وعلبة سجاير ..

رحت له بشقته في يوم عطلة وكالعادة كان يحط المفتاح تحت السجادة قدام الباب لانه ماله خلق يفتح الباب للمسايير ( انا عرفت الحين ليش صديقة المفضل محمد السوداني) دخلت عليه لقيته توه بيموت قصدي ينام لاول مره ما اشوفه على السرير بالشقة
اكتشفت ان فراش السرير ماخذ شكل جسمه ،، قلت له محمد انت نايم على تابوت؟
قال خل عنك مصاختك شتبي؟

وقدرت بتوفيق الله وحسن اختيار الوقت اني اقنعه بالمشروع واخذ تحويشة عمره الـ 10000 دولار( كلمته وهو في حالة النرفانا اللي بين النوم والقعدة اللي يكون فيها مستعد ينام .. انا اسميها ساعة النشوة لانه يكون مثل السكران..

قال لي عبارة المعتادة واللي طالما كرهتها ولكن كان لها وقع خاص في نفسي هالمره (الله يقطعك) خذ الفلوس بالكبت
فتحت الكبت وكانت الصدمة ...
اكتشفت فيه شي خطير
كان يحط بالكبت الهدوم الوصخة ،، كانت ريحة الكبت مثل اللي دافن فيه ميت

قلتله محمد وين ملابسك النظيفة قال بالكبت ,, !!!
عقدني
قلت لا لا اللي تلبسهم وين؟
قال ايه بالكبت !!
قلت زين والوصخة (يعني بصيدة) ؟؟
قال اعطيها للمتشردين

اكتشفت السر طلع يشتري قميص وجنز ويلبسه لين يعفن ويعطيه للمتشردين ( ماله خلق يغسل او يروح المصبغة)

فتحت درج اسفل الكبت وهبت علي ريحة امونياا ( سكرته على طول وانا كاتم النفس ) قلتله شنوو بالدرج ؟ قال ملابسي الداخليه ، قلتله تعطيهم للمتشردين بعد؟ قال ايه
قلتله لا تكفا ادفنهم حرام عليك.

التفت له وانا اقول في نفسي يارب الفلوس مو بالدرج يارب الفلوس مو بالدرج

قلتله الفلوس وين ... قال تحت سراويلي
قلتله محمد انا كنسلت المشروع خلاص...

يتبع.....